الأعتقادات

من طرف **shabanah2007** الجمعة يناير 16, 2009 9:24 am

الأعتقادات
صورة تراثية شعبية بقلم ووجدان
الداعي بالخير: صالح صلاح شبانة
Shabanah2007@yahoo.co
طول عمر الاعتقاد في حياة البشر موجود ، ولكل ناس آمالهم وأحلامهم ،
والهم خصوصياتهم ، واعتقاداتهم ألشعبيه
والاعتقاد الأول إننا مش لحالنا عَ ها لأرض ، معنا ناس يرونا ولا نراهم ،
مخلوقات تحت الأرض دونيه
وهذول ايديهم طايله ، مرات بنقول عنهم أسيادنا ، وبنشركهم في كل مقرراتنا ،
وأفكارنا وأرآئنا القوميه
وكل ما بصير معنا بقصد ولاَّ بدون قصد ، بنربطه مع أحداث ، جايز ها لأحداث
تبقى مليحه وجايز تبقى رديه
للطير إن طار ، وللديك إن كيكس ولاَّ نهَّق لِحّمار ، وإذا نعق البوم ولاَّ نعب الغراب ،
بنربط ها لأصوات بقضيه ،
وان حَكَّت الأيد ولاَّ صنَّت الذان ، ولاَّ انكبت القهوة عنا ولاّ عند الجيران ،
نتباشر بمناسبه إلكوسها مضويه
تلاقي أحلامنا وآمالنا ، مرتبطه بتفكيرنا واعتقادنا ، واعتقادنا راسخ...
جوانا مليح لتفسيره الأولويه ،
******* ***** **** ***** ******
طول عمر الاعتقاد جزء منا ، ولكل قريه خصوصيه ،مثل بصمات الأصابع ،
متشابهه... بس بنسبيه
مظهرها غير محظرها ، وكل ناس بتتباهى ببصمتها ، وبتحافظ عليها ...
من الهوا لِمّزوبع والنسمات الطريه
إن رفت العين اليمين ، اشتبشروا با لخير ، وان رفت اليسار ، يا حزن يا خسار ،
اتوقعوا أخبار مأساويه
وان حَكَّت الأيد اليمين بدها تسلم ، وان حَكَّت الأيد اليسار ، بدها تقبض قبضه ،
جاييتها عَ الطريق عطيه
وان حَكَّت الرجل اليمين بدها تمشي بجوازه ،فيها أكل الهبر ومص العظم ،
وذا حَكَّت اليسار بدها تمشي بجنازه فوريه
وان نطت العجينه من الباطيه ، ولاّ حبى الصبي اللي مشى ، ضيوف جايين عَ الدار ،
حاملين معهم هديه
و عَ مبدأ ما بنعيط عَ رمضان ، بنعيط عَ طبخاته ، يا سلام عليك يا رمضان ،
قديش طبخاتك شهيه
وان انكبت القهوه خير حضر ، قال : كبوا القهوه من عماهم ، وقالوا الخير اجاهم ،
بس هيذ تفسيراتنا العلميه
****** ***** **** * **** ***** ******
وإن كيكست الجاجه مثل الديك ، مثل نعيق البوم ونعيب لِغراب ، وجواح الكلب..
بنص الليل ، مآسي حقيقيه
نحذر منها ونحاذر ، وكل ما ّدق الكوز في الجرة ننقز ونجفل ،
يا ترى الشر اجا؟؟ ووقعت البليه ؟
وبتعلق قدرنا ومقدورنا بكيف نفّسرها ها لاعتقاد ! حتى لو مخالف للعقل...
وشرع الله والسنة النبوية
والحسد بندعق له من آثر المحسود ،بعد ما انطش رصاصة ،
ونشوف مين اللي حسد وشو الهويه ؟
ذكر ولا أنثى ؟ عيون زرق وأسنان فرُق؟ وبندهنه بزيت مولد ،
وبنحرق له شعير مولد وبنقرا له الرقيه
أرقيك وأسترقيك من عين أمك وأبوك ، وكل اللي بحبوك ،
محّوط بذكر الله وبآياته القرآنيه
وان طلع شحاد في العين ، نروح على حدا من ها لجيران ، نشحد رغيف ،
بدون غموس توكله بهنيه
***** ***** **** * **** ***** *****
وللي بتحبل وبتولد ، وللي ما بتحبل ولا بتولد ، جاجه سودا ولأّ حمامه بيضا ،
ولا ّذنبه بس اسود ، ولاّ عين جرادة مشوية
وللي بهدبد اكلة كراعين معتبرة ، بتنقط زفر ، تلاقي ريحتها في البلد ،
عابقه يتجيب الواويات والذياب من البريه
وللي ايده مرشومه بالثواليل بيتنجانه ولا مصران بتعقد ولا ّصابونة ميت ،
ولا رجل جاجه معدتها مفرية
وان نام طفل في دار جيران وقت السهرة يحطوا على صدره رغيف يحميه ،
من شر الشياطين اللي على الباب مستنية
وللخرز سحر عجيب ،واعتقاد بقوتها يفوق الطب والدوا ،
يفوق الحكيم والاسبيطار والفرمشيه
وللحجاب موقع الوسام على الصدر ، بتكمن جوا هالمثلث الورقي ،
لرموز سحريه بتسيطر عَ القوى الخفية
كل أمة حيه ، وكل شعب عريق ، مادد في الأرض جذور ، عنده أساطير ،
وقصص واعتقادات شعبية.
تقرأ بلهجة أهل سنجل

من طرف **aboezra** الجمعة يناير 16, 2009 2:52 pm

:سقفة: :سقفة: :سقفة: :سقفة:

من طرف **انابيل** الأحد يناير 18, 2009 6:52 am

اليوم حكتني ايدي الشمال قولك رح اقبضلي شي قبضة
فعلاً هي اعتقادات منسمعها كتير وما منعرف شو مصدرها الاولاني وسببها
مثلاً خدلك هالكم معتقد يلي منسمعهون
لا تكنسوا بالليل بتلموا حوليكون العفاريت
ولا تصفر بالليل بتتجمع حوليكون الشياطين
ولا تقص اضافركون بالليل بموت حدى على قلبكون عزيز
طيب شو قصة الليل معهون
موضوع جميل يا ريت هالناس تبطل هالمعتقدات السخيفة وكأنه لساتنا بعصر الجاهلية ويعرفوا انه ما بصيرلهون شي إلا بأمر الله
تحياتي لك