الطرش فى القنوات الفضائية(2)

من طرف **aboezra** الأربعاء ديسمبر 03, 2008 3:51 pm

الطرش فى القنوات الفضائية(2)

أرسل لى أحد الأصدقاء هذه القصة، ولا أعرف مصدرها

ظهر على إحدى الفضائيات فى نهار رمضان رجل عجوز يرتدى جلبابا أزرق ، تستضيفه مذيعه ملونه الأطراف يصاحبها مذيع غير معروف لمشاهدى البرامج الدينية . قعد الرجل وتبحبح وربع رجليه وكأنه يجلس فى مصطبة المتولى ثم قال أنا بعد بحث شديد فى أصول الدين ومراجعة الفقة والشريعة أكتشفت اكتشاف خطير ..

خير يا مولانا ؟؟
تصوروا .. إن السجاير مش بتفطر فى رمضان -
مش معقول -
المذيع : والله العظيم بتتكلم جد ؟
البحبحانى : أيوه يا ولد . أمال انا جاى هنا أهزر .. السجاير لا تفطر لأنها ليست أكل أو شرب ولا تدخل المعده

أخذ المذيع يتحسس علبه سجائره بشغف

يعنى أدخن وأكمل صيام ؟؟ -
عادى جدا .. ولا كأنك عملت حاجه -
المذيعة : طيب والشيشه يا سيدنا الشيخ ؟؟
حلال حلال حلال .. الشيشه لا تفطر ولا تفسد الصيام -
- دا ؟؟ شىء بديع قوى .. يعنى انا وصاحباتى ممكن نضرب حجرين قبل ما نيجى التليفزيون الصبح ؟؟
- أكيد، والأحسن لو تبعتى تجيبى لنا شيش هنا نشيش قدام الساده المشاهدين عشان يطمنوا خالص
ثوانى يا مولانا -
أعزائى المشاهدين .. رمضان كريم .. فاصل ثم نعود لنواصل مع العلامة البحبحانى.

نرى إعلانات مليئه بمزز الفضائيات ,وأعتقد انه كان يجب ان يسبقها تنويه بأنها إعلانات للكبار فقط أو من التصنيف 3 حسب رأى (الاوربت) وتحتوى على مشاهد قد لا تتناسب مع المحافظين والصائمين كذلك

انتهى الفاصل لنجد الديكور قد اختلف تماما حيث جلس كل منهم متربعا على كنبه وبيده ( لى ) شيشه معتبره وأخذ يشيش فى إستمتاع

البحبحانى : شفتوا بقى يا ولاد .. سهله خالص .. ولا تفطر ولا حاجه
المذيع : معاك حق يا مولانا .. أنا ضربت حجرين ونص لحد الوقتى وبرضه حاسس بمعاناه الصيام .. وأكتر
البحبحانى : يبقى ثوابك أكتر إن شاء الله لأنك بتعانى أكتر
المذيعه : أنا اللى بعانى أكتر لأن الشيشه مكتومه والولعه نايمه
البحبحانى : ورينى كده
أخذ يشد من الشيشه حتى ملأ الاستوديو بالدخان الكثيف
البحبحانى : خدى يا قطه .. الولعه تمام بس شدى جامد
المذيع : يا سلام لو فنجان قهوه بقى مع الشيشه
البحبحانى :وماله يا بنى حد قال ان القهوه بتفطر
المذيع : أمال مش بتفطر ؟
البحبحانى : لأ طبعاًَ .. اللى بيفطر هو كل حاجه تدخل الجوف .. إنما القهوه بتطلع على الدماااااغ عدل .. أنا بشربها مظبوط
المذيعة : حالا يا مولانا ، طب والشاى برضه على الدماغ ولا إيه ؟
البحبحانى : الشاى الساده فقط يا بنتى .. إنما لو شاى باللبن يفطر وتخسرى صيامك والعياذ بالله

تحسس المذيع جيبه بتردد ثم سأل : بقولك إيه يا مولانا بما إن السجاير والشيشه مش بيفطروا .. كنت عايز اسأل عن الحشيش يعنى ..إيه نظامه معانا ؟

البحبحانى : أنتم قلتوا لى مالكوش قوى فى الدين .. صح ؟
المذيع والمذيعه فى نفس واحد : خااااااااااااالص
البحبحانى : حيث كده بقى أحب أقول إن الحشيش دا نبات .. والنبات من مخلوقات الله .. إتكل على الله يا بنى .. معاك تركى ولا أفغانى

المذيع يخرج ورقه سيلوفان ملفوفه بها شىء ما

المذيع : تركى يا مولانا
البحبانى : لأ .. التركى مش حلو .. مش كميل .. يشحط فى الزور
وبعدين الأتراك دول ناس علمانيين أكيد الحشيش بتاعهم بيفطر

يخرج المذيع قطعه أخرى

المذيع معايا حته تانيه ما بتفطرش أهى .. أفغانى
البحبحانى : أيوه كده فى السليم .. مش عايزين نخسر صيام يوم

وهكذا مضى البحبحانى يحلل ما يطيب له من دخان ومشروبات وشيش وحشيش وطفح تلاته قهوه وقزازه كولا ,. كل هذا وهو يقنع المذيعين المغيبين أصلا ,. أنهم ما زالوا على صيامهم
وبدأ مفعول الحشيش

البحبحانى : أنتم عارفين يا ولاد ان الصيام مستحب فى رمضان .. خصوصا الاثنين والخميس
المذيعة : والله بحاول أواظب على اليومين دول على قد ما اقدر
المذيع : انا بقى مش بفوت يوم منهم .. صيام الاتنين والخميس فى رمضان شىء مقدس بالنسبه لي

ثم طلع لنا الباشمهندس بفتوى اخرى وهى ان الحجاب ليس فرضا ( الحجاب وليس النقاب ) حتى أنه سيفتى بأن صلاه الظهر سنه مؤكده

من طرف **انابيل** الخميس فبراير 26, 2009 9:43 am

الطرش فى القنوات الفضائية(2)

الطرش فى القنوات الفضائية(2)

رد: الطرش فى القنوات الفضائية(2)