ازاى تبقى رومانسى,

من طرف **hesham650** الثلاثاء أبريل 22, 2008 12:10 am

ازاى تبقى رومانسى, Looooooooooooool

1-
لما تكون شريكة حياتك مسافره كده او رايحه مشوار بعيد شوية تقولها وانت بتسبل بعينك كده
لأ كده كأن عنيك دخلتها ريحة بصل .. سبل بنعومة وررومانسية زي اللي كان بيحصل وانت في ثانوي لما بتقابل مزة تحل من علي حبل المشنقة وانت ماشي ف طلعت حرب
حبيبتي انا قلقان عليكي من المشوار ده وعلشان كده انا جيبتلك بودي جارد يحرسك وتبتسم ابتسامة حلوة كده
وتطلّعلها دبدوب صغير من ابو 15 او 20 جنيه

*******

2-
فى اي مناسبة عاطفية كده يوم الحب مثلا
اشتري كام ورده حمرا بس تكون حقيقية يعني 10 او 20 كده
بس ياريت قبل يوم الحب لأن البياعين بيستغلوا الموقف وهيافه الشباب ويزودوالسعر10 مراتد فأفضل تجيبه قبل يوم الحب
وممكن تشيلها عند البواب او فوق السطح ورش عليهم ميه ويكونوا نص تفتيح علشان يصمدوا لغاية عيد الحب
أقولك . . وممكن تخطف رجلك لحد صفط اللبن او كف طهمس وتميل علي اي غيط (لا ما تسرقش)
طبق ايدك في خمسة جنيه هايعملك حزمة (أقصد باقة ) متينة ريحان علي ورد علي شويه ججي وبرسيم اهو الموجود يسد
وهات واحدة بلاستيك وحطها في النص
وكارت صغير من المكتبة اللى على اول شارعكم
واكتب: هافضل احبك لحد اخر وردة ما تدبل

*******

3-
طبعا اكتر الطرق لاسعاد حبيبتك لو بتشتغل
ابعتلها في مقر شغلها باقة ورد كده جميلة
وكلمتين حلوين برضه في كارت
اكيد طبعا في الشغل بقى زمايلها هيقولوا شوفتوا الحب يا ولاد وتعليقات حلوه كده هتخليها تحبك اكتر
بس ربنا يستر ومفيش واحدة من زميلاتها تديها اسفين حقد وتقولها دا باينوا عامل عملة واكيد هو دلوقتي بيعمل مصيبة مع واحدة تانية
او
تعجب بيك زميلة تانية ظروفها وحشة مع جوزها او مش متجوزة من اساسه .. وتكون مزة محصلتش وتشتغلك واحنا الرجالة(الا من رحم ربي) قليلي الحيلة امامهن وساعات من ريحتهن وكثيراً من لبسهن .. هن .. هن

*******

4-
لو حبيبتك عندها قط صغير بتحبه
وكل ما تيجي تقولها كلمتين حب تقولك
اسكت ده القط بتاعي عمل كذا النهارده
يبقى انت في عيد ميلادها وانت جايبلها هدية
هات للقط الغلبان ده هدية كمان
طبعاً لو مدامتك كانت مكبرة دماغها من حيث النضافة ومربية صراصير (يا مسعودي) او نمل وحصل تعايش سلمي بينكم
ممكن في اليوم ده تجيبلهم شوية سكر او تسألهم بيحبوا ايه
واللي يفرح المدام يفرحك

*******

5-
طبعا معظم البنات مش بيعرفو يطبخوا
واكيد مراتك زي الفل فى الطبيخ
وحابين تقضوها مة تيك اواى المهم في مرة وانت بتطلب بيتزا مثلا اطلب منهم يقطعوها على شكل قلب
ربنا يستر ما ترميهاش في وشك وتقولك بالزمة مش حرام التكاليف دي .. دا انا المحشي اللي باعمله والفشه والكرشة
مش احسن من القلب المعووج ده

*******

6-
يعني لو مراتك تعبت في البيت كده دور برد خفيف
بس همه بيحبو يتدلعو علينا .. خدلك انت اجازه من الشغل
وخليك جنبها واعملها شوربة .. لو بتعرف
لو مابتعرفش بلاش .. مش ناقصة عك
وشغلها فيلم رومانسي كده
وطبعا متنساش شوية عصير ليمون او برتقال
طبعاً هاتتفرج عليه لوحدها لانها هاتقولك خلص المواعين مش ناقصة اقوم من العيا عل الحوض . زي الثور اللي مربوط في ساقيه

*******

7-
في يوم اجازه هاتلك شوية بالونات من اللي بيطيروا لوحدهم
دول فيهم غاز الهيليوم .. واربطهم في شنطة العربية من جوه طبعا واطلع انت ومراتك رحلة رومانسية كده لوادي الريان او العين السخنة يعني شوفلك مكان رومانسي هادي
وانزلو من العربية واعمل نفسك مشغول في اي حاجة
واديلها مفتاح الشنطة بتاع العربية
قولها هاتي الجاكيت بتاعك ولاّ اي حاجة
طبعا هيّ اول ما هتفتح البالونات هتطلع على طول
وياسلام لو كنت رابط كارت كبير شوية كده مكتوب عليه بحبك

لو مفيش عربية .. مش مشكلة
قضوها بعجلة او فسبا او حتي ميكروباص البساتين او البدرشين
وطبعا بلاش بالونات الهيليوم مش هتنفع
قضيها نفافيخ من ام عشرة بجنيه
اللي في كل ميه اتنين مش مخرومين .. وخليها هي اللي تنفخهم .. علشان تقطع نفسها وتهدها شوية
وبعدين .. اطلعوا علي عين الصيرة .. او المدبح وقضوها عزومة كوارع وحلويات (فشه وممبار وطحال) .. هممم

*******

8-
عارف ياسلام عليك لو في يوم كده صحيت انت بدري
وحضّرت الفطار وجبتهولها فى السرير
تبقى فعلاً فعلاً فنّان

بس اوعي وحياه ابوك وانت بتقدمه تتكعبل وتوقعوا علي ملاية السرير واللحاف
وهتسمع وصله صريخ ونواح .. عينك ماتشوف الا الضلمة
اللحاف .. لا دي الملاية وهتتغسل .. ملاية بقولك اللحاف .. علشان اهلي اللي جايبينه .. القطن هايعطن
.. ياستي نغير االملاية .. احنا قادرين نجيب ملاية سري بدل اللي اتقطعت لما هاننجد
يوم منيل لما بتقعدلي في البيت
وشوية فلكلور وجمل تراثية مش قد كده .. تحتوي علي عباات غير لائقة .. تتمحور حوالين .. عدم جدواك عائلياً .. وفي محيط الرجالة عموماً .. وغيره من رصيد السيدة الفاضلة والدتها ورثتهم عن جدتها السيدة الفاضلة ماري منيب واخواتها
اعتقد في ده هتكون نهاية حياتك الزوجية
لا حياتك الشخصية علي الارجح